Hawwata Tuuristii
Fincaa'aa Qexoo
Fincaa’aan laga Qexoo Magaalaa Gabaa Roobii irraa gara bahatti km 42 fagaatee bakka addaa Qexoo jedhamutti argama. Fincaa’aan kun daandii aspaaltii Finfinnee gara Dambi Doolloo geessuu irraa meetira 500 kan hin caallee fagaata. Fincaa’aan kun dheerina meetira soddoma caalu irraa kan gadi fincaa’uudha. Dabalataan fincaa’aa kana duratti lafti diriiraan namni irra bashannanuu danda’u fi fincaa’icha faana akka fedhetti suuraa ka’u danda’u dhagaa xixiqqoo uwwifamee bareedee jiraaachuun isaa hawwattummaa isaa daran dabaleera. Kun immoo carraa misoomuu iddoo hawwataa kana ta’eera.Yeroo ammaa bakki kun tajaajila bashannana adda addaa kanneen akka daakaaf,cidha gaa’ilaaf,akkasumas hojii viidiyoof oolaa jira.
Nooraa Waaqayyoo
Nooraan kun nooraa uumamaa yeroo ta’u, laga Xibbee kan Aanaa Haawaa Galaanii fi Aanaa Sayyoo daangessuun yaa’u irratti bakka addaa ganda Haawaa Fiinchoo fi ganda Baddeessoo giduuttii argama. lagni kun uumamumaan yookaan hirmaannaa namaa osoo hin dabalatin lafa dheerina dalgi isaa meetira torbaa olta’u jala uree bahuun yaa’a.Hawwaasni naannichaa kan gamasii fi gamanaa , akkasumas,horiin lafa lagichi jala yaa’u sana gubbaa akka nooraatti fayyadamuun walitti adeemu.Haawaasni naannoo sanaa nooraan kun kan uumaamaa ta’uu isaa dhugaa bahu. Nooraa kana gajjaallattii lagni kun fincaa’aa ol dheeraa qabaachuunsaa miidhagina dabalaataa ta’ee argama.
Bosona Birbir
Aanaa Haawaa Galaan iddoowwan hawwata tuurizimiif oolan biroo isheen qabdu keesaa Bosona Birbir isa tokko.Bosonni kun toora bishaan Birbir kan daangaa Aanaa Haawaa Galaanii fi Iluu Abbaa Booraa gidduu yaa’u fuulleeffachuun balina lafa hektaara kuma kudhanii ol uuwwisee akka argamu ragaan ni ibsa.Bosonni kun mukeetii gosa garaa,akkasumas bineensotni gurgoddoon kanneen akka Gafarsaa,Warabboo ,Leencaa karkarroo balinaan kan keessatti argmaniidha.Dabalataan sinborroonnii gosa gara garaa heddumminaan argamu.
Bishaan Birbir bosona kana keessa kutee waan darbuuf bineensota bishaan keessa jiraachuu dandaa’anis ni jiru
